Felis dia… nos kier gradici tur persona cu a bishita Comprondiendo Bida via WordPress te awo. Danki na boso support nos a haja suficiente atencion y motivacion pa sigi cu e projecto. Mientras tanto nos muda e website pa www.comprondiendobida.com

Nos ta invita bo cordialmente pa bishita nos riba e website aki y enrikese bo bida cu informacion balioso nobo y duna nos bo feedback y referi nos na bo netwerk di famia y amigo. Riba e website nobo bo por join nos mailinglist nobo y tambe bo por sigui nos via Facebook y Twitter.

Cu un saludo di curason… Ingrid Werleman

Kico e palabra ‘spiritualidad’ ta nifica pa bo?

‘Spiritualidad’ pa mi ta e dimension mas lew cu e ‘quantum level’ , pero pa cua e ‘quantum level’ ta un entrada. Simplemente bisa, e ta e ‘nivel’ di energia universal cu ta duna bida na tur cos. Bisando esaki, mi ta expresa tambe cu pami no tin ‘diferencia’ of ‘separacion’ entre e mundo fisico y e mundo spiritual. Nan ta fuertemente conecta. Pero e ta depende di desaroyo di e sensibilidad di e persona pa capta esaki, y mas ainda pa incorpora esaki den bo bida diario.

Con esaki ta manifesta su mes den bo pintamento?

Spritualidad ta kisas e tema mas fundamental den mi obranan. Den prome lugar: cada cuadro ta traha den un ambiente y cu un conciensia spiritual. Di dos: E ‘paisahenan’ cu bo por mira, realmente ta paisahenan interno, di mi, y di tur hende cu ta conecta cu nan of reconose nan. Di tres: e tecnica cu mi ta usa ta pa expresa energia (espirito), den forma di un structura no-solido, colornan di tera y oro, composicion, espacionan y tempo no-defini. Di cuater: E tema (naturalesa) ta pa enfoca riba nos medio ambiente natural, cu realmente ta conecta fuertemente cu nos espirito. P’esey mi ta boga pa concientisacion y conservacion di esaki pa medio di arte visual.

Pakico no ta usa arte mas como un metodo pa concientisacion di un pueblo? pa su balornan como pueblo? pa aprecia y stima mas loke ta di nos?

Ami ta hasi esfuerso pa esaki, marando mi obra na nos medio ambiente natural y personal, y mi trabou educatvo diario tanto paden como pafo di enseñansa. Otronan ta scohe otro temanan segun nan nivel di desaroyo di conciensia spiritual y necesidadnan. Esaki no ta algo cu por forsa. Cada persona (artista pintor) ta keda un hende cu mester pasa den siglonan di desaroyo pa bai dilanti. Un artista tin un rol hopi importante den su comunidad, p’esey nos t’aki, pero no tur rol ta mescos. Mas desaroya bo ta, mas bo ta duna bo comunidad libremente. Esaki ta e ‘Arte di comparti’

Con pa stimula mas amor pa arte di chiquito cerca nos muchanan?

Mucha – como sernan spiritual – tin e amor natural pa arte (=creatividad!) caba. Nos mester percura pa keda stimula esaki segun e fasenan di desaroyo spiritual, mental y fisico di e mucha. P’esey mi ta den enseñansa! Nos mester programanan (= curiculo y metodonan) propio, den cader di nos cultura y nos idioma, na scolnan pa uso diario. Esaki ta e unico solucion ‘masal’ Por lo demas, mayornan conciente por yuda ‘nan’ yiunan confrontando nan cu arte y creatividad diariamente, den tur situacion.
Pero atrobe, e ta keda na e desaroyo di e ‘alma’ ey cuanto e ta capta, siña, y aplica den su bida.
Ami ta kere:”being alive is being creative!”

Ta posibel pa bo describi bo alma di artista den palabra?

Si. Un alma di artista ta mescos cu e alma di un mecanico, accountant, politico, dentista, waiter, etc. etc., pero cu ta consciente di su mes un spiritualidad, di su relacion cu tur otro alma,  y di su esencia y poder creativo! A base di esaki e ta bai expresa su mes na manera unico. Pero ta importante pa corda cu arte ta unicamente un aspecto di un totalidad di desaroyo spritual largo di un individuo. Pues no ta tur ‘artista’ automaticamente ta creativo y desaroya…

For di un mesa banda di e waitress un senjora a lanta y sin bisa nada e a brasa e waitress. E waitress a jora un rato riba su schouder y despues ruim op e tayonan. Ora e waitress a bolbe na mesa di e famia, e tata a pidi despensa y e waitress a smile.

Ta pret pa mira con accionnan simpel, manera duna un brasa, por saca e miho di hende, hasta den momentonan dificil. Pensa un rato…’Ken abo lo brasa awe?’ Mi ta sigur cu abo tambe sa topa cu situacionnan asina… y tin ora bo tin gana di hasi mescos cu e senjora… pero bo ta pensa: ‘Kico e hendenan rond lo pensa?’ No worry, djis sigi bo curason.

Ami a hasi esaki hopi biaha, den pleno supermercado of riba caya. Poco dia pasa un amigo a bisa mi : ‘mi por brasa bo, djis brasa bo…nada malo… mi ta sinti mi un poco mi so’. ‘Claro, mi a contest’e'… mi tin hende cu nos ta brasa otro masha dushi mes como nos ritual pa cuminda otro…djis brasa, niun intencion…ora hendenan wak nos stranjo, nos ta wak otro y bisa : ‘Nan no sa CON DUSHI un brasa ta!!!’

Oke e mundo mester ta podise mas hende cu ta brasa otro y djis comparti un tiki di nan calor humano…pensando riba ‘dia di San Valentin’…Ken abo lo brasa awe? Brasa bo casa…bo enamora…pero brasa tambe bo yiu, bo major, bo ruman, bo amiga/o di alma, bo colega, pero tambe djis brasa un hende cu bo ta kere cu por usa un bon brasa… awe…majan y cada dia di bo bida… bo lo smile…y hasi otro smile…y bo ta alegra un mundo cu ta di nos tur.

E cadena di amor y dolor…un pensamento dedica na tur mucha herida…

Mi a sinti pa traha un cadena awe…

E lo bira un cadena cu mi kier bisti riba dia di san valentin…

Of podise mi por bend’e…

Eigenlijk mi no tabatin un meta specifico…

Gewoon mi kier a traha un cadena…

Mi kier a hunga cu e material…entretene mi mes…

Mientras mi ta concentra mi mes riba e pins cu ta pidi tur mi atencion…

Y den e silencio sin pensamento cu mi tabata aden…

Mi a bay bek den mi ninjes…

Mi tabata mira mi mes…

E mucha chiquito…semper cu su nanishi den bukinan…

E mucha chiquito cu no por a papia…

Cu no por a comunica…

E mucha keto derepente a sinti un sentimento di pas grandi cu a rondon’e…

Keto asina…e la compronde cu tur cos den bida tin su sentido…

Esaki por fin su mente y espiritu adulto a compronde…

E dolor nunca lo bay total…

Pero…mi por dun’e un lugar den mi bida…

Y sigi cu mi futuro…

Mi ta e mucha ainda… y… mi no ta e mucha mas…

Ami ta pas … y … mi ta turbulencia…

Pero bida semper ta sigi …

Ami ta biba y mi ta sigi cana…

Reflexologia ta pone presion leve cu e duim den cierto zona, pa calma malesa y tension. E stimulacion ta yuda pa calma dolor, ta yuda pa saca stofnan toxico di nos curpa y ta preveni cierto malesa y problema di salud cu ta stroba nos di gosa di salud total. Reflexologia ta yuda nos haja e balance natural di energia di nos curpa bek. Reflexologia ta yuda henter bo curpa funciona na un forma harmonioso sin cu necesariamente bo mester usa remedi. Reflexologia di pia ta traha cu e zonanan di tur e organonan di e curpa cu ta localisa bou di e planta di nos pia. Esaki ta e sistema mas usa.

Ta existi tambe reflexologia di man, pa cara, dede y huña, pa barica y cuero. Basicamente ta usa e mesun tecnica pa tur e partinan di e curpa aki, pero den e diferente parti di e curpa.

Beneficionan di Reflexologia:

1. Ta baha tension.
2. Ta mehora circulacion tanto di sanger como e circulacion energetico.
3. Ta yuda mehora e funcion di e diferente organo di e curpa, sin efecto secundario.

E frecuencia di tratamento ta ser determina den acuerdo cu e pacient. Den casonan di urgencia ta recomenda un terapia cada 48 ora pa asina laga e stofnan toxico cu ta bin liber dor di e masashi sali di e curpa. Den casonan cronico por cuminsa cu dos sesion semanal y despues di dos siman, un bes pa siman.

Pa hendenan den situacion special of di cierto edad ta importante pa nan consulta cu nan dokter si reflexologia ta adecuado pa nan. Ta pensa e ora riba personanan hopi anciano, hende muhe na estado, pacientnan cu mester bay opera of cu problema cu curason, diabeticonan, baby of pacientnan cu problema di circulacion.

Por usa kanebloem como te pa suavisa hopi malestar:

Herbe un cuchara di flor seco pa cada kopi di awa. Bebe 1 kopi pa dia. E ta protega bo sistema gastrico, e yuda ora tin problema cu stoma, cu problemanan cu tripa, ulcera, gastritis, kramp, etc.

E ta protega e higra, ta yuda baha colesterol y evita dolor di menstruacion. Kanebloem ta yuda elimina liquido den e curpa, loke ta bon pa hende cu kier baha peso. E ta trankilisa den caso di nerviosismo y insomnio. Bo tin dolor di djente? Alivia e dolor dor di spula boca cu un te frui di kanebloem.
Den compres pa pone riba cuero: herbe e flornan di e mata den awa durante 15 minuut y laga nan fria. Muha un gaas y pone 15 minuut riba e pleki desea.

Kanebloem ta fungi como un antiseptico y ta juda cura e cuero ora di corta, herida, infeccion etc. Tambe si bo tin wowo malo dor di p.e. alergia, wowo cansa un compres cu kanebloem ta hasi milager.

Biba saludabel… usa e forsanan di naturalesa… pero corda… cu simptomanan cu bo mes no por cura… bay dokter… e la studia pa cura bo…

Kico ta ocasiona celulite?

Con pa preveni celulite ?

In de tijden waarin we leven hebben we geleerd om zo zelfstandig mogelijk te zijn…

Recht te hebben op onze eigen plekkie…

Dus ook al hunkeren we van binnen naar die ene liefde…

Onze ego laat dit vaak niet toe …

Het zal steeds valkuilen voor ons scheppen…

Om ons te laten denken…

Nee… nu nog niet…

Nee…dit is het niet…

En uiteindelijk gaan de jaren en kansen voorbij…

En onze lege handen… onze lege armen…

Zullen ons niet aan kunnen vullen…

Ze kennen alleen maar …ons…

Ze zijn niet gegroeid…

En zijn niet verrijkt met de warmte van die ander…

Talves si nos tuma un tiki mas tempo pa nos ‘biba’ y disfruta e cosnan simpel di bida…nos lo bira menos malo? Esaki ta un pregunta hopi interesante y den hopi estudio ya a conclui cu hendenan cu ta biba un bida balansa, unda ta traha tempo pa mas cos cu solamente trabao y diberticion tin un miho calidad di bida. Hendenan a bira manera adicto na trabao y a perde e contacto cu e mundo di naturalesa, e mundo di comunicacion humano, e mundo pa sirbi otro, e mundo pa tuma tempo y scucha e hendenan cu nan ta stima, no solamente cu nan orea, pero cu nan curason… Nos a perde contacto cu e mundo di silencio y ta yena nos mundo cu tur sorto di desorden cu ta stroba nos di scucha…di tuma tempo pa bida mes…

E cosnan cu tin balor real den bida… tin ora nos ta siña aprecia nan  ora cu ta mucho laat…Nos yiunan cu ta nos tesoro y regalo di bida di mas grandi…nos ta trese nan na mundo yen di alegria… Despues di algun siman…hopi bes nos bida ta sigi…nos ta sigi cu nos trabao y nos ta laga e guia y educacion di nos yiunan den man di otro hende. Hendenan cu tur bon intencion, cu ta duna nan cariño y guia, pero nunca mescos cu nos como mayor lo por duna nan. Paso, pensa bon, ken lo por stima un yiu, mes hopi cu su mayor??? Nos ta parse di ta biba den un mundo unda e norma y balornan di henter mundo ta bahando dia pa dia na un velocidad cu ta mata nos. Nos ta biba den un Aruba, unda tin hobennan di menos cu 20 aña ya a hasi mas cu un aborto, pa evita cu nan ta haya yiu. Esaki ta e secretonan di hobennan, cu nan ta conta solamente ora nan tin confiansa real, cu nan sa cu e mundo adulto lo no traiciona nan of husga nan. Paso hopi biaha nan no sa miho, kico pa hasi. Ni unda pa bay cu nan deseperacion… Nos ta biba den un mundo unda nos ta papia habri cu nos hobennan riba temanan manera sex, droga, criminalidad, violencia, paso nan ta temanan interesante. Talves ta mesun importante y necesario pa nos papia na un forma habri riba temanan manera confiansa, respet, amor, humildad, asertividad, amor pa bo mes. Temanan cu no ta asina espectacular y popular, pero si hopi fundamental den formacion di e caracter y personalidad di nos muchanan y hobennan. Tin biaha no ta e cosnan grandi ta hasi e diferencia necesario den un comunidad of den bida di un hende. Tin ora ta juist e palabra di apoyo cu a habri un caminda of un porta. E simia cu nos ta planta den e mente y curason di e otro cu talves ta duna su fruta despues di hopi tempo, pero cu a duna un alivio y motivacion pa sigi padilanti. Ta e cosnan aki ta e cosnan di balor real den bida…cosnan cu nos no mester laga bay perdi…cosnan cu ta pone nos compronde miho…e esencia di bida…e balor di bida cu ta duna felicidad berdadero…Abo ta cla pa cuminsa…awe???

Tin un cantica di ‘Crosby, Still, Nash & Young’ cu ta yama ‘Teach your children right’, esta siña bo yiunan ‘corecto’ of ‘bon’. Esaki ta un frase cu por pensa y bisa hopi di dje. E cantica ta bisa cu de bes encuando bo tin cu ‘djis hala rosea, wak bo yiunan y ‘sa’ cu nan ta stima bo’. Esey ta berdad, no tin un yiu cu den e fondo di su curason, no ta stima su mayornan. E cantica ta bisa cu ta importante pa laga e yiunan liber pa hasi nan propio decisionnan, pero ta importante pa duna nan un base.

Banda di esaki e actitud y mercadeo materialista salvage no a pasa nos tampoco voorbij y nos kier a duna nos yiunan mas cu nos a haya y aki talves nos a lubida di duna nan suficiente rais. Pero tanten, nos propio raisnan tambe a bira un tiki esclavo di e medionan di comunicacion masivo y entretenimento den tur skina. Bida parse di ta un fiesta continuo, ‘la vida es un carnaval’, e famoso cantica di Celia Cruz no por a bis’e miho. Y asina nos ta yegando na e siguiente generacionnan…

Y e siguiente generacionnan? Nan a lanta hopi biaha den un famia unda ambos mayor tabata traha of den un cas cu un mayor so. Nan a falta hopi calor di famia. Nan a crese cu un actitud di protesta, hopi independiente. Nan a busca nan propio norma y balornan, cu den hopi caso tabata hopi idealista, bunita y humanista, pero…sin un base pa sosten’e… E rais hopi bes no tabat’ey, e halanan pa bula bay tabata cla pa habri desde chiquito… Nan a lanta den un mundo unda ‘tempo pa otro’ a bira un cos masha scars… Tur cos ta bay mas lihe, competencia ta fuerte…nos mester di hopi cos… Combersacion a bira scars, television a bira central den hopi cas… hopi madushi y padushinan ya no tabata mucho interesa den conta storia y e nietonan tampoco tabata echt interesa pa scucha. Nintendo, ‘Mario Bros’, X-box y zo tabata yena nan mente y alma suficientemente. Bida social tambe a bira hopi importante… Violencia, critica otro tur dia riba radio y den corant a bira normal. Si no tin un problema cualkier hende ta cre’e, pa asina pueblo por sigi entretene nan mes cu n’e. Simplesa di bida a bay perdi, mas digital, mas moderno, mas up to date, miho!

Parse cu hopi hende no tin tempo mas pa ‘amor’, pa un simpel caricia. Pa bisa otro cu ‘mi ta stima bo’, ‘con ta bay?’, ‘danki’…cosnan positivo, simpel, pero cu ta acaricia nos alma y di esnan cu mas nos ta stima. Entre otro ‘nos yiunan’…

Nos yiunan ta siña di nos ehempelnan…como mayor…como sociedad.

Bo a yega di pensa pa bo mes ‘ki mayor bo ta?’

Bo ta tuma tempo pa bo yiunan…pa hasi cosnan leuk cu nan…pa bay lama cu nan…hunga un rato cu nan…lesa un storia pa nan…’djis’ scucha nan???

Of bo ta…un mayor ‘gruñon’…solamente interesa pa gana placa of hasi carera…bo ta duna bo yiu placa enbes di atencion…bo ta gusta critica y zundra den cas…bo ta bebe burachi y droga y bo yiunan sa esaki…bo ta gusta mira video y peliculanan di violencia…

Bo yiu ta siña di bo ehempel y di e sociedad cu e ta biba aden. Banda di mayor bo ta tambe trahador, colega, amigo y famia. Con bo ta comporta bo mes den e rolnan aki? Bo ta corigi hende ora cu nan ta actua violento?

Nos yiunan ta siña di nos ehempel y di e sociedad cu nan ta biba aden. E violencia cu nan ta manifestando actualmente no a ‘nace’ den nan…E ta un expresion di nan vivencia, di loke nan ta absorbe di e mundo rond…Talves e ta un grito di nan pa nos como adulto cuminsa planta un otro simia den nos comunidad? Un simia di amor, di norma y balornan mas halto y limpi…E felicidad di nos yiunan ta nos responsabilidad…Talves si nos cambia ‘nos’ esencia, nos por duna nan un otro ehempel, un otro experencia…Nos tur hunto por hasi’e…nos tin cu cuminsa un caminda…

Den un programa na radio, mi a scucha e siguiente expresion bunita ‘Ora bo yiu bin di scol y pidi bo un pan cu pinda y bo hunt’e y lag’e riba mesa pa e bin cog’e…bo ta dunando bo yiu atencion. Si bo ta traha e pan cu pinda, pone den un tayo, yama bo yiu y dun’e e pan bisando e un palabra di carino…esey ta amor… Corda bon ‘Ta e gestonan chiquito den bida ta conta…nan ta e recuerdonan cu  ta keda pa semper’

Comentario di drs. Dimitri Halley, psicologo:

E articulo ta trata e topico importantisimo di un amor propio abou (self-esteem) bou di nos hubentud. Mescos e ta papia di e forma con anos como adulto ta neglishando nos hubentud. E forma y e medida den cual nos hubentud ta ‘sinti y biba’ e negligencia aki ta un problema gigante. E negligencia aki hopi bes ta ser tapa dor di malcria e muchanan cu tur clase di aparatonan electronico cu a tuma over e rol di un mama of pecho electronico, un tolerancia cu no conoce frontera y falta di disciplina. E falta sistematico di atencion y guia adecuado aki ta resulta den un falta di balor propio abou (self-esteem) bou di nos hubentud. Den e profundidad di nan alma nos hendenan jong ta sinti nan mes sin balor, dor di e sentimento cu nan mayornan ta balora cosnan material, rikesa y otro cosnan mas cu nan propio yiunan.

E pensamento di mas halto cu mester guia mayornan ta cu ningun ‘cos’ (no-“thing”) por reemplasa e rol di amor y atencion genuino y berdadero ora nos kier lanta nos yiunan cu un berdadero sentido di balor propio. Y ta net e amor y atencion genuino y berdadero aki ta loke mas ta falta den nos sociedadnan moderno. E falta di balor propio aki a bira algo permanente pa hopi hoben. Un falta y bashi cu nan ta purba compensa cu cualkier cos cu por duna nan un boost halto y lihe. E ta pone nan sinti importante, potente y ‘necesario’. Mayornan hoben (Teenage pregnancy), droga, gang, adiccion na video games ta formanan alternativanan pa nos hendenan hoben haya un sentido falso di balor propio. Di e forma aki nan ta tapa e falta di balor y interes genuino den cosnan of relacionan abusivo y dañino. A bira mas cu tempo pa nos como adulto examina nos norma y balornan. Cuanto tempo mas nos por warda pa determina si nos hendenan jong ta hayando e atencion ‘real’ cu nan merece??