Reflexologia…e arte di cura cu masashi.

Mas of menos 4000 aña pasa, culturanan antiguo manera e Egipcio- y Chinesnan, tabata usa Reflexologia manera un berdadero disciplina di terapia cu a pasa di generacion pa generacion. E reflexologonan antiguo ta hendenan cu poco poco a descubri e existencia di puntonan specifico atraves di cua por stimula e funcionamento di bo organo, kliernan  y otro partinan di bo curpa.

Reflexologia ta pone presion leve cu e duim den cierto zona, pa calma malesa y tension. E stimulacion ta yuda pa calma dolor, ta yuda pa saca stofnan toxico di nos curpa y ta preveni cierto malesa y problema di salud cu ta stroba nos di gosa di salud total. Reflexologia ta yuda nos haja e balance natural di energia di nos curpa bek. Reflexologia ta yuda henter bo curpa funciona na un forma harmonioso sin cu necesariamente bo mester usa remedi. Reflexologia di pia ta traha cu e zonanan di tur e organonan di e curpa cu ta localisa bou di e planta di nos pia. Esaki ta e sistema mas usa.

Manzanilla – Kanebloem y su efecto curativo

‘Dios a pone su botica den naturalesa pa tur hende por tin remedi’…Kanebloem ta un yerba aromatica cu hopi acidonan importante pa nos curpa: Alfa-bisabolol (den e flor), ascorbico, salicilico, cafeico, caprico, gentisico, linoleico palmitico, oleico, pectico (den e blachi di mata)

Por usa kanebloem como te pa suavisa hopi malestar:

Herbe un cuchara di flor seco pa cada kopi di awa. Bebe 1 kopi pa dia. E ta protega bo sistema gastrico, e yuda ora tin problema cu stoma, cu problemanan cu tripa, ulcera, gastritis, kramp, etc.

Celulitis…. nos por evit’e of cura di dje?

Celulitis ta un cadena di bolonbonchi di vet acumula cu por forma tanto riba e bilnan, e chanchan y e stoma. Den hulandes e ta conoci tambe como ‘cuero di apelsina’. Celulitis ta worde ocasiona dor di aumento di celnan di vet den e cuero cu ta pega na otro y asina ta forma e bolonbonchinan di vet. Motibo di esaki ta un mal circulacion di sanger y e curpa cu ta retene mas likido cu e tin mester. Celulitis ta afecta principalmente e hende muher.

Celulitis ta mas complica cu e simpel vet cu un curpa ta acumula normalmente, pesey e no ta kita tampoco cu un dieta normal. Celulitis ta un combinacion di vet, awa y stofnan toxico cu keda pega bou di e cuero y no tin caminda pa circula. Ta pa e motibo aki e no ta los ni cu e dieetnan mas streng. Esaki contrario na vet normal cu si ta kima cu dieta.

E tratamento di celulite ta depende di e nivel di e celulite. Tambe e ta depende di e calidad di e cuero y di e custumbernan di bida.

E poder di bo sub-conciencia…Kico bo tin den bo mente?

Prome cu bo usa bo sub-conciencia, bo mester conoce su principionan, su leynan.

E leynan mas importante ta esakinan:

Cada imagen visual concreto cu tin tur nos atencion, tin e tendencia di realisa su mes.

Si e boluntad y e creencia ta contradeci otro, semper y sin excepcion boluntad ta perde. Si bo ta malo y bo ta kere (creencia) cu bo no ta bira bon, bo lo no cura ni maske con hopi bo lo kier (boluntad) esey. Hopi hende ta pone tur nan boluntad pa yega un meta, pero no ta logra. Otronan ta usa nan imaginacion y si ta logra. Un condicion primordial pa logra ta pa no carga pensamento y imagennan cu ta contradeci e meta.

Cada intento cu bo hasi pa logra algo, sin usa bo imaginacion bibo ta casi destina pa fracasa.

Bo mente tin dos parti, e parti conciente (10%) y sub-conciente (90%). Abo ta e hardinero. Tur dia nos cada un ta plantando simianan di pensamento den nos sub-conciencia cu ta forma nos realidad di cada dia. Loke bo sembra bo lo cosecha den bo bida y bo alrededor. Pesey corda semper ‘Sembra bon, pa bo cosecha ta abundante’. Esaki ta cuminsa cu un accion simpel, pero super importante, esta ‘cuida bo pensamentonan’. Pasobra loke bo pensa, bo ta atrae den bo bida. Asina tin hopi hende cu ora bo puntra nan ‘con ta bay cu e bida?’, nan ta contesta ‘luchando’. Y aunke hopi biaha nan no realmente kier men esaki y nan no ta realisa cu e mensahe cu nan ta mandando pa nan sub-conciencia ta ‘bida ta un lucha’. E sub-conciencia na su turno lo crea e circumstancianan perfecto pa bo bida bira un lucha.